（一）
王子傑：
嗱，我真係好尊重你的，響你全朵而唔直接叫你柒頭傑。坦白講，我諗咗好耐到底寫咩好，因為平時有咩心底話都講過晒啦。
雖然你條友越來越毒，但係永遠係我中學最老死嘅朋友嚟。多謝你平時成日聽我喺度吠，講埋啲煩膠情情塔塔嘅嘢。雖然最尾都係追唔到佢（可能係你呢個軍師累事lol），不過都真係多謝你俾咗咁多意見我，兄弟嘅嘢大家心照啦，太肉麻嘅嘢就唔寫出嚟喇哈哈。
其實同你經歷過嘅嘢又點止咁少！雖然我哋中四開始唔同班，但econ堂坐大家隔籬都冇咩分別啦，喺度特別鳴謝你無私咁提供大量燈塔notes，DSE有星一定請你食飯，立此為證！
講返你，唉咁多女唔揀，係都要向難度挑戰，不過我理解嘅，又靚性格又好嘅女仔有邊個唔想溝。其實呢排聽你講，我又唔覺得冇機會，佢真係唔想理你嘅就唔會成日同你傾計又單獨同你去踩單車啦，是咪先？溝女都不外乎嗰幾樣嘢嘅姐，膽大心細面皮厚，雖然你只係得心細而面皮薄過紙皮，但真心你係有條件嘅，嘗試吓用你嘅誠意感動佢啦，我估佢呢啲好女仔可能細膽啲，你唔做主動就碌柒㗎喇。一句講晒，加油啦又開追悼會，你而家溝女咁嘅節奏真係死得，加把勁吧，當然唔好唔記得溫書，仲有三個月就考DSE了，希望大家mat屎同英文都有5，一齊入到中大！
p.s. 好耐無寫過咁多字，證明你地位崇高
柒明
2017冬
（二）
To 王子 prince：
MERRY CHRISTMAS！！
其實呢我記得我地中一係同班 雖然唔熟haha
到上年中五又同班先發現你做左王子lolll 其實你話你識寫歌編曲作詞果陣真係嚇親 真係好勁！！！雖然我都有彈下琴 但係當然無你咁勁啦 你話你d chord係撞出泥果下我真係好葡萄 點解我諗唔到架！嬲！總之你真係西利啦 跟住唱歌都好聽 singcon唱騷靈情歌真係拍得住原版 係抵你攞冠軍ge btw你踢波都勁 果次（好似係班際比賽）入波我同阿wing尖叫左出聲俾啲人望住 笑死lol
Anyway雖然都就畢業啦 但係唔代表關係一定要完結ge 得閒搵我食飯又好玩音樂又好 我都無任歡迎架 講真架！最後DSE都要加油呀 雖然睇你成績入大學應該無問題 但唔好咁自滿 我地要一齊入中大讀journal！同你勾手指尾
聖誕快樂 新年快樂！
Yan 2017
（三）
My Royal Highness（有冇用錯？）：
話咁快就識咗你五年，不過同你鐘意人哋嘅時間相比就冇得比嘅......
真係冇諗過你男人老狗都咁細膽，講真你鐘意人呢家嘢就眾所鳩知架啦，你上堂𥄫住人仲要畀人發現，真係笑到我爆肚。好心啦，做男人就勇敢些少，拎啲男子氣概出嚟，鐘意咪鐘意囉，認咪認，鐘意靚女好羞恥咩，放心喎，我唔會笑你癩蝦蟆想食天鵝肉！
嗱真心，我覺得你係勁嘅，又踢波又讀書勁又自彈自唱，情歌王子喎，丁死人啦，仲要長情，「八年傑」！真係可歌可泣，攞咗差唔多半世人嘅時間去鐘意一個人（雖然你而家都係18歲），畀我係當事人都感動到想喊啦頂，我話人地一啲都冇心動過嘅你都唔信啦。講咗咁多，爆啲料益下你喇，不過唔好開心到爆血管。唔係氹你，其實你女神只係唔想成為男人之間嘅話題only，對你其實ok有好感架，你嘅優點同長處佢全部approve架（佢有係我面前讚你份人細心體貼），只係可能佢比較慢熱，反應慢咗啲，你知啲女人係咁架啦！所以呢，你唔好放棄，真係有機得米架，冇呃你，講大話一世冇仔溝！
By the way呢張卡我講嘅嘢唔好俾你身邊啲八公知呀，你知就好喇，班契弟咁口疏，費事揚出去打草驚蛇啦係咪先，同埋俾啲時間空間人哋效果更好
聖誕快樂 搏一搏單車變摩托
Macy
13-12-2017
(四）
素心：
記得你上年問我點解張聖誕卡咁大張，我冇答你，我諗今年你應該又要問多次呢條問題，可能仲會加多句「嘩仲大張過上年 同埋寫聖誕卡竟然要加紙」。我喺度俾個答案你啦：因為我有好多嘢想同你講，但又唔夠膽面對面講，唯有用文字嚟表達。
雖然你唔會記得，但係我哋已經識咗九年，下年就係一個decade喇。我哋第一次同班嗰陣係小三，你嗰陣傻更更咁（雖然我都係），唔知點解就同你做咗朋友。年代雖然久遠，但係喺操場跑完之後一齊返課室涼冷氣嘅情景我仲有印象㗎！之後嗰幾年雖然唔同班，但都有keep住傾計，多謝跑online哈哈。到小六要填表揀中學，聽你講話想入陳紹棠，我偷偷哋咁改咗份表，就係為咗想同你繼續一齊讀書，結果又真係成功喎。到咗中一咁啱同班，又咁啱坐隔籬，嗰陣就日日喺度傾計，傾到俾郭sir鬧。講真，同你談天說地真係開心過聽佢教咩factorization好多呀嘛。中三再一次同班，發覺你識打扮咗，份人又成熟咗，講嘢又溫柔咗，好似你係嗰陣開始俾大家推舉為女神？唔知有冇記錯呢。
到高中喇，我哋開始講吓未來，你講過話想做個女飛機師，話好鍾意翱翔天際嘅感覺，遲啲會去澳洲或者美國嘅大學讀航空，我就明我只係得返兩年幾嘅時間。所以我盡量得閒就約你周圍去，去東涌踩單車、去海山樓影相扮文青、去睇變形金剛，其實真係好開心，呢種開心唔單止因為活動本身有趣，更加主要嘅原因係我鍾意嘅人就喺我身邊。記唔記得前年我哋一齊去尖東海傍倒數？講真，如果得我自己一個人肯定係喺屋企瞓覺或者上吓高登留名算，但係因為有你，我做每件事都有咗一個原因，嗰晚同你係得八度嘅街頭度黐住咁行係我成世人最快樂嘅時光。我哋手臂貼著手臂，雖然我個口話「後面班人想逼死我哋咩」，但心入面其實好想佢哋再推得用力啲，咁我唔需要任何原因就可以再接近你少少。當你喺我嘅世界入面，連喺街頭俾人逼到沙甸魚咁都變成一件浪漫嘅事。上年歌唱比賽，本身我都冇膽參加，係你成日鼓勵我話我唱歌好聽，連報名表都幫我攞埋填埋我個名上去，我先至有勇氣去做我心底一直好想做嘅事，我先至有勇氣做我自己。我知道我嘅假音唔好聽，但係我記得你好鍾意張敬軒，特別係佢首騷靈情歌，於是我每日放學之後都跑去學校後面山個涼亭苦練呢首歌，唱夠兩個鐘頭先返屋企溫書。有幸俾我碌咗入決賽，前一晚緊張到完全瞓唔著，眼光光等天光，成晚就係不停咁攞條毛巾捽乾淨件黑色西裝。唔係因為我好在意攞唔攞到冠軍有冇得喺大家面前威，係我知道你會嚟睇，我好驚發揮得差，影響咗你對我嘅印象，辜負咗你嘅期待。「我全神看你 以靈魂來抖氣 感覺多騷靈 以無邊溫柔吻你」唔單單只係歌詞，其實更加係我想對你講嘅表白說話。當我唱完之後大家歡呼，你喺台下遞紮花俾我嗰陣，我好想好想直接拖住你隻手拉你上台，跟住光明正大同大家講「我想送啱啱首歌俾呢個咁靚咁可愛嘅女仔」，但係我又點會真係夠膽咁做？我一直好痛恨自己嘅軟弱，如果可以俾我好似山下智久咁回到過去同長澤正美表白，我一定會捉實你隻手唔放，直到你嗌痛為止。食慶功飯嗰陣，我送咗個獎盃俾你，你除咗笑笑口多謝我，仲問咗句「你係咪有嘢想講呀」，我竟然答「冇」。如果有時光機，我真係想返去嗰個情景一巴車落自己塊面度。當你講「算啦冇嘢喇」之後露出一個尷尬嘅笑容，我已經心知不妙。寫咗咁多，過去咗嘅事冇得重新嚟過，但係我希望即使得返幾個月嘅時間見面，我哋都好好一齊開心咁過，好唔好？
啊差啲唔記得咗呢張係聖誕卡，祝你聖誕快樂、新年進步，DSE順順利利！
by一個鍾意咗你八年嘅人
15/12/2017
（五）
傑：
好多謝你嘅聖誕卡，我會珍而重之咁keep一世。我好感動，睇完你張卡喊咗我成晚。
但係有啲嘢錯過咗就係錯過咗啦。
不如咁啦，你咁了解我，你以後做我軍師好唔好？我鍾意咗D班個班長（千祈唔好俾佢知），聽講佢好鍾意睇NBA，鍾意咩塞爾特人喎，你識咁多嘢，不如下次你介紹吓俾我聽啦？成功咗一定請你食餐好嘅！
我其實冇你想像中咁好，只係一個好普通嘅女仔。
知你都鍾意軒仔，咁有冇聽《找對的人》？你一定會喺合適嘅時間遇到合適嘅人㗎，我對你好有信心！
最後，希望我哋友誼長存，可以繼續WhatsApp傾通頂啦 :)
by永遠支持你的好朋友;)
23/12/2017