我媽不知道從哪裡弄到了兩張迪士尼的門票，然後把它們塞到我的手上。
「阿仔，攞去同女朋友玩啦。」
「我講咗幾多次，我冇女呀！」
「啱啦，冇女就要去追，搵個女仔同你去。」
於是我想起你 —— 應該說我只會想起你。
我們相約在迪士尼站出口會合。炎炎夏日，你一身清涼打扮，白背心配襯搖曳的淺啡長裙，頭上頂著頂花紋綑邊的草帽。
「嚟玩啫，洗唔洗噴香水呀？」
「要呀，玩到出汗臭親你就唔好啦。」
我很討厭那種濃烈的、夜店感覺的氣味，你身上淡淡的花香正好。火車徐徐前行，悶熱的空氣頓時變得涼快。下了車，你嚷著要玩咖啡杯，於是我們走到那圓頂帳幕下排隊，然後登上一個粉紅的杯子。兩雙手臂瘋狂地扭動轉盤，杯子愈轉愈快，你身後的背景漸漸變得模糊，好像只有你存在於我的世界。你咧嘴笑得像個傻瓜，眼睛都成了一條微縫。
「喂唔得，頂唔順，抖抖先！哈哈。」你扶著我的手臂說。
「Hello，你就係Nelson？我係Jane個朋友呀，nice to meet you。」
「係呀，hello！不如我哋去食嘢先？橫掂而家都六點鐘喇。」
「好呀。啊！我知道呢度附近有間食burger嘅，聽講幾好味，不如我哋去試吓？」
「好呀，我仲諗女仔唔鍾意食呢啲添，會整污糟隻手呀嘛。」
「哈哈，我唔係咁港女嘅。去啦！」
我們走進某間裝飾花哨的餐廳。
「嘩，呢度啲嘢食咁鬼貴嘅，食個M記咁嘅餐都成舊水。不如我哋玩完先出去食啦？」
「傻啦，我哋啱啱先入嚟，等到睇埋煙花，出到去都成九點鐘。貴就貴啦，我請你。」
我們最終只點了一個餐，你還堅持要給我五十元，說好女孩不應讓男孩付賬。我們打開盒子，看著小得可憐的漢堡包，相視笑了起來。你徒手把漢堡包撕成不平均的兩半，把大的那份給了我。
「咁杯汽水點呀？」我問。
「我哋一齊飲囉，我唔介意口水嘅。」於是我們共用一支飲管共飲一杯可樂。
「呢度啲包真係唔錯，不過有啲鹹。不如我哋叫啲嘢飲？」我說。
「好呀，唔該！」她放下用紙巾包著的安格斯牛肉漢堡，向侍應揮手示意。「我想要凍檸水，Nelson你呢？」
「我想要雪碧，唔該你。」侍應點過頭後走遠。
「飲汽水我覺得唔多健康，所以不嬲都唔飲嘅。」
「Um......你都啱嘅，不過一次兩次冇所謂啦。」
步出餐廳，熱氣從地面蒸上來。
「不如去聽嗰個咩米奇幻想曲？」我提議。
「好呀。」我們坐下來，她取笑我眼鏡上頂著3D眼鏡的模樣，說我是「六眼仔」。
「食飽我哋不如去睇戲啦？我想睇Iron Man，應該唔錯，夠刺激，你ok嘛？」
和女生約會的時候，很難說不的。
「頂，原來套嘢睇到一半會噴水㗎？搞到我件衫同個袋濕咗。」你向我投訴。
「少少啫，好快乾啦，話明係4D呀嘛，梗係要整啲特效啦，唔係咪會俾人投訴貨不對辦？」我回答。
「跟住，我哋不如去玩揸車嗰個？」你提議。
「估唔到你鍾意玩喎。去啦！」
你雖然說想模擬駕駛的感覺，但是車卻由我來操控。
「下年你考到車牌，我要做你第一個乘客！我想夜晚去海邊睇星星。」
「去赤柱？」
「傻嘅，赤柱又光又多人，識去梗係去大浪灣睇啦！」
「食完飯睇完戲，你有冇邊度想去？」我禮貌地問她。
「冇呀，你呢？」她問我。
「你有冇興趣去大浪灣睇星星？橫掂我今日有揸車嚟。」
「嘩正喎，好呀！」
她可能會以為我是很浪漫的人，其實不然。
「係呢，話時話你有冇諗過第時想做啲咩？」我轉換話題。
「我想做作家或者導演，文青想做文藝嘢。」你給我答案。
「文？邊度文呀，睇過？」我笑起來。「你雖然係一個靚女，但骨子裡係一個麻甩佬。」
「講呢啲！你唔覺得如果搞藝術嘅人消失晒，世界會又悶又無聊咩？」
「覺㗎，所以等緊你出道。出咗名唔好唔記得我呀！」
「咁不如直接寫你落本小說度做男主角？實唔會唔記得啦。」
「我想讀精算呀，跟住入銀行做嘢。」我和她坐在空無一人的沙灘上。「對我嚟講，有唔錯同穩定嘅收入，可以得閒去吓歐遊就好開心㗎喇！」
我和浪花的距離又遠了一點。
她下了車，座墊又重新變得冰冷。
終於等到八時半，我和你站在睡公主城堡前。
「其實我好鍾意睇煙花，個感覺好夢幻。」你說。
五彩煙花在半空綻放，我從你的眼眸看到小孩對這個世界的好奇。
---------------
不得不說，你的眼光確實不錯。一個可愛的女生映入我的眼簾。
「Hello，我叫Claire呀......哈哈，好尷尬添。」
「唔尷尬唔尷尬，識個朋友啫。」我連忙答話。「我叫Nelson，你當我係Jane咁相處就得㗎喇！」
「Jane都係咁講，佢話你嘅性格同佢好似。」
「佢咁講呀？Um......係有少少似㗎哈哈！」
「其實呢，」你邊把生牛肉放到鍋中邊問我。「點解你唔搵返個女朋友？」
「其實我係gay㗎，我而家係你面前出櫃。」
「頂你，認真呀？」
「講笑啫，香港咁多靚女，我唔捨得中途轉gay。」
「咁你點解唔搵女呢？你都唔係差呀。」
「我呢啲人多多要求但又唔係金城武梁朝偉，註定A0一世㗎喇。」
「例如咩要求？」
「唔港女、性格爽直唔好要我估估吓、鍾意大自然，最好有健康膚色同文藝少少。樣呢，靚就當然最好啦。」
「我好驚戶外活動㗎，俾太陽曬幾個鐘真係敷返一個禮拜美白面膜都搞唔掂呀！」
「咦，咁我好似都符合要求喎 —— 不過我唔夠靚，failed。」
「正常嘅，香港女仔好似都係鍾意行商場多過行山？哈哈。」
「夠㗎喇！你估我想溝林志玲咩？」
「算啦，你唔洗諗咁多喇。係呢，話時話你鍾唔鍾意聽張敬軒？佢遲啲好似開演唱會。」你轉換話題。
「我好鍾意《春秋》，好想聽佢現場唱呢首歌。」我說道。
「我最鍾意《我的天》，感同身受。」你不加思索地回應我。
「我係咪有故仔聽？」
「有呀，不過唔同你講。」
「算！咁點呀，你想約我去睇？」
「冇啦，我嗰排應該已經去咗日本exchange。咦係喎，我有個女仔朋友都鍾意聽張敬軒，不如我幫你約佢一齊去睇？」
「嘩，Jane姐想做媒人呀？」
「其實都好啊，佢都成日呻冇pool出，你又未有著落，如果你哋一齊出pool就好！」
「吓，好似好奇怪喎。」
「唔會啦，奇咩怪啫。佢都唔差㗎，幾可愛，份人又善良！」
「但係......」
「唔洗但係啦，就咁話！」
「唔知佢今晚會唔會唱呢？」她說。
「希望會啦。係呢，都七點半啦，不如我哋埋單行喇？」我看看手錶。
---------------
「點呀，我嗰兩個朋友得唔得呀？佢哋大把人溝緊，見大家老死一場先益你咋！」
「唔啱呀。」
「一個都唔啱？」
「係。」
「你咁高要求㗎！」
「係囉！」